[المصطفى حرموش]

الله يلطف،شوفو من حالي
هاد الخدمة..حلفت لا جات
خوكم شوماج،خوكم بطالي
ما قضى سهير،ماقضاو سادات...

راني مهموم،ما أنا بوهالي
القراية سم،والسم لسعات
ما حاسْ بالمزود،
غير المخبوط به بْحالي..
شكون إداوي حر الكيات...

المحسوبية..
المحزوبية..
الوصولية..
والرشوة محزمة بالعلالي،
سير حتى جي..الوقت حماتْ..
كيفاش..سفينتنا غادية بلا مالي؟؟
راه دعاوي البيطالي تقلب فين تْـــبات..

نيران قوية ساكنة ف دخالي،
نتسنى شكون يطفي كي الجمرات..
''كية اللي ما عندو زهر ''
هادا موالي
الزوجة كاينة..فين المحراث؟؟

فين الوعود؟؟هادا سؤالي..
جاوب الوزير..مول الفهامات
صبر شويش حتى سيني الدومالي
نسبق نسيبي..أمول الضخمات

الشكوى للمولى للرب العالي،
يطلق سراحنا،تفرج الكربات..
إعم الخير..التوأم الدوالي،
الواد يحمل..نقول جميع..
الشوماج مات..


القاموس اللغوي:
الدومالي: كناية على المسؤول على مالية الحكومة''وزير المالية""
الضخمات: أصحاب النفود
العلالي: أمام الملأ وفي واضحة النهار